Kagge Forlag presenterte haustens bøker:Ny roman frå forfattaren bak Kongepudler

Erling Kagge presenterte årets bøker frå Kagge Forlag i dag. (Foto: Kari M. Hestad)

- Den anonyme forfattaren ventar på å bli avslørt, sa ein smilande Erling Kagge under dagens lansering av Kagge Forlags haustbøker.

- Det er faktisk veldig merkeleg at ingen har forstått kven det er enno.

Den satiriske romanen «Kongepudler» som kom ut tidlegare i år har til no selt i 39.000 eksemplar. Spekulasjonane kring kven den hemmelege skribenten kan vere, har vore mange. F

Haustens roman er venta i månadsskiftet september/oktober og har fått tittelen «Kinderegg-effekten».

Ifølgje forlaget er boka ein miljøthriller om makt, moral, mord og mange pengar. Petter Stordalen skal befinne seg i ei av hovudrollene, saman med blant andre miljøvernminister Helen Bjørnøy, Kristin Halvorsen, kronprinsesse Mette Marit og kronprins Haakon.

- Det er inga slem roman, hevdar Kagge, som insisterer på å kalle «Kongepudler» ei maktkritisk bok, skriven med stor humor, noko som ifølgje han også vil kjenneteikne den komande utgivinga.

Humor og alvor

Pia Haraldsen er klar med ei bok om shopping og sjekking. (Foto: Scanpix)

Haustlista inneheld mange godbitar.

Pia Haraldsen skal i oktober vere klar med ei bok om shopping, sjekking, skikk og bruk - som har fått arbeidstittel «Pias bekjennelser».

Snøbrettkøyraren Terje Håkonsen kjem med livsstilsboka «Korn», om sunn mat, miljø og energi.

Og forlaget er tydelegvis ikkje ferdig med Se og Hør: Slugger-journalist Arne O. Holm er klar med ei ny bok om sladderbladet: «Ja, vi elsker Se og Hør». Han skal ha lese heile ti årgangar av bladet og sett på menneska som blir portretterte der, for å finne kodane for det som er ei av tidenes største ukebladsuksessar.

Erling Kagge trur ikkje folk er lei av å lese om blekka alle elskar å hate, trass vårens medieoppstyr kring forlagets førre bok om bladet, Håvard Melnæs' «En helt vanlig dag på jobben».

- Melnæs skreiv ei innsidehistorie. Arne Holm skriv om Se og Hør som eit redaksjonelt produkt, forklarar Kagge.

Hakkespettbok for pappa

Per Asbjørn Risnes er bokaktuell med Hakkespettbok for fedre. (Foto: Kari M. Hestad)

Skribent Per Asbjørn Risnes jr. er klar med ei ny pappabok: «Pappa kan alt. Hakkespettbok for verdens beste far (og bestefar)». Tidlegare har han gjeve ut «Verdens beste pappa» (2003). Den gongen handla det om papparolla når barna er i bleieskift- og leikeplassalderen. Haustens bok er for fedre med litt større barn, ifølgje Risnes.

- Det er ei handbok i «how to impress your kids», seier Risnes til ABC Nyheter.

- Boka gir innblikk i alt ein pappa er forventa å kunne og lære frå seg til barna sine, som trylletriks, sykle, plystre, stupe og spikke seljefløyte.

- Kan du alle desse pappa-tinga sjølv?

- Eg kan plystre og sykle i alle fall, ler Risnes.

- Men boka er først og fremst meint som inspirasjon. I tillegg til å forklare korleis ein lagar dragar, skriv eg også om kommunikasjon, korleis ein gjennom å gjere ting saman med barna, skapar rom for gode samtalar.

Risnes har sjølv to barn på to og fem år. Han er oppteken av den moderne papparolla og meiner at boka kan sjåast som eit innspel i den pågåande manns- og pappadebatten.

- Idealet mitt er den gode gamle bestefarspappaen, han som kan alt og har svaret på alt. Blanda med dagens omsorgspappa, sjølvsagt. Det handlar om å vere ein god rollemodell, eit godt, maskulint forbilde.

Provoserande om kvinner

Preben Z. Møller vil skape debatt i haust med si bok om korleis kvinner undertrykker menn. (Foto: Kari M. Hestad)

Ei bok som venteleg vil skape debatt i løpet av hausten, er Preben Z. Møllers': «Pen søker trygg. Hvordan kvinner undertrykker menn». Ifølgje forlagets omtale skal Møller med denne boka ta for seg dagens mannsideal, som framleis krev at mannen skal vere sosialt og økonomisk dominerande i forhold til kvinna - også i ei tid då likestilling har vore idealet.

Målet med boka er ifølgje forfattaren å ta for seg «blindflekkar» i dagens kjønnsforsking.

- Eg er absolutt for likestilling, men det manglar bitar i puslespelet, seier Møller til ABC Nyheter.

- Likestilling består av både rettar og plikter. Etter mi meining skortar det på pliktområdet for dagens generasjon unge kvinner. Det er framleis slik at mannen er den som tar økonomisk ansvar. I 9 av 10 tilfelle er det kvinna som flytter inn i mannens leilegheit. Menn er opptekne av å sikre seg økonomisk tryggleik alt medan dei er studentar, hevdar han.

- Det må vere mogleg for menn å framstå som vellukka utan at denne økonomiske tryggleiken er på plass, seier Møller.