Trekkfugl med nye rutetider
(NPK): Måndag såg mannskapet på ekspressbåten Solundir to tjeldar like ved Rysjedalsvika i Hyllestad.
For naturfagkonsulent Alv Ottar Folkestad er tjelden eit sikkert vårteikn.
- Dette var svært tidleg og heilt uvanleg, seier han til NRK Sogn og Fjordane. Tjelden overvintrar langs kysten av England og er ikkje vanleg å sjå i Noreg før mot slutten av februar eller tidleg i mars.
Mildver og sønnavind har truleg utløyst trekka frå Storbritannia så tidleg.
- Eg tippar at hormona har spelt dei eit lite puss. Dei har nok trudd at vi har kome lenger på året enn det vi verkeleg er, forklarar Folkestad.
Det er også gjort tidlege observasjonar av trekkfuglar andre stader i Vestlandsfylket. I Askvoll vart det sett tjeld 26. januar. I Gloppen har dei sett grågåsa og i Svelgen viste linerla seg fram 25. januar. (NPK)