Det er på høg tid å ta debatten om norsk EU-medlemskap

(Dette meiningsinnlegget vart først publisert på Framtida).

I dag, 9. mai, blir Europadagen feira – ein dag som markerer eit samarbeid som er viktigare enn på lenge, og som Noreg bør vere ein del av.

Noreg er i dag medlem av EØS. Det tener oss på mange måtar godt, men det er ikkje ei perfekt løysing.

Ein stor del av lovverket vårt stammar frå vedtak fatta i EU. I EU-parlamentet har ikkje Noreg noka påverknadskraft. Det svekkjer sjølvråderetten vår. Det er på høg tid å vere der avgjerdene blir tekne – ved å bli med i EU.

Stormaktsspel

I den tryggingspolitiske situasjonen vi står i no, er det viktigare enn nokon gong å stå saman med våre næraste allierte i Europa.

Vi ser ei verd der stormaktene i aukande grad forsøker å hevde seg. Nabolandet vårt, Russland, har invadert eit anna naboland.

Kina styrkjer posisjonen sin som stormakt for kvar dag som går. Og vi kan kanskje ikkje lenger stole på USA i same grad som før.

Dette er ikkje i Noreg si interesse, og det er heller ikkje noko vi kan stå imot åleine. Difor er det på tide å ta del i dei europeiske avgjerdsprosessane som påverkar oss kvar einaste dag.

Rungande ja

EU har dei siste åra utvikla seg frå å vere ein rein økonomisk handelsallianse til å bli ein meir integrert union, med samarbeid på dei aller fleste område: Frå vaksinesamarbeid under pandemien til klimapolitikk og tryggleik.

Dette er ikkje noko Noreg bør vere tilskodar til, men noko vi må delta i. Viss vi ikkje er med, risikerer vi å bli hengande etter i utviklinga.

Sjølvsagt må eit norsk EU-medlemskap avgjerast gjennom ei folkerøysting. Frå meg er det eit klart og rungande ja!

Stemmer er ABC Nyheters debattseksjon. Her skriver faste og sporadiske bidragsytere om nyhetsaktuelle temaer. Vi har også et samarbeid med den politiske nettavisen Altinget.no . Brenner du inne med en mening eller analyse, kan du sende teksten til stemmer@abcnyheter.no, så vil vi vurdere den.