Tulipanar likar ikkje farris
Du har sikkert opplevd det du og: Gleda med å pakke ut ein tulipanbukett ein kald vinterdag: Så fine fargar, det ser mest ut som du har fått våren inn i stova!
Men så blir du så skuffa når tulipanane heng med hovudet og mistar blad etter blad etter berre nokre dagar.
- Er det meg, tenkjer du kanskje.
- Likar dei seg ikkje her hos meg?
Tender, loving care
Det er i alle fall enkle ting du kan gjere for at tulipanane skal kjenne seg blide og fornøgde og stå i frisk flor i dagevis. Berit Ørpetveit på Plantasjen i Haugesund har gode råd:
- Snitt helst stilken med ein gang du kjem heim, og snitt han rett over, ikkje på skrå.
- Fyll vasen med halvlunka vatn, sånn ca 3 cm opp i vasen. Hald vatnet på det nivået heile tida, viss du greier det.
- La tulipanane stå i det plastomslaget dei kjem i - i vasen - om lag ein time før du tar det av.
- Set tulipanane i eit kaldt rom om natta og medan du er på jobb.
Ikkje bobler
Så enkelt, og så vanskeleg å etterleve.
- Sitronbrus og farris, då, spør eg.
- Det meiner folk at eg skal bruke.
Men nei, det meiner Berit på Plantasjen at vi ikkje skal gjere.
- Drikk heller brusen sjølv, er hennar råd.