Kommunestyremøte med kunst og poesi
Kultursjefen i Tynset heiter Jon Ole Hokstad, og sjølv om han for tida er på tur i Roma, vil han gjerne få skryte av kva dei har fått til i heimkommunen.
- Då me sette oss ei målsetjing om å vere ein kulturkommune, så fekk eg ein idé som eg ønskte å omsetje i praksis, fortel Hokstad.
- Eg ville gjerne at det lokale kulturlivet skulle få bidra, og med det vart ideen om kulturinnslag i forkant av kommunestyremøta fødd.
Kunst til dei folkevalde
Kvar gong kommunestyret samlar seg, får dei servert litt lokal kultur i form av målarkunst, diktlesing, song eller dans. Og ifølgje kultursjefen så er det meir enn nok kultur å ta av i Tynset.
- Me har ein aktiv musikkskule, me har musikk, dans og dramaline på den vidaregåande skulen og me har mange frivillige kulturorganisasjonar.
Om kommunestyremøta blir betre av denne nye praksisen, vil ikkje Hokstad meine noko om, men han fortel at det har vanka mykje positiv omtale både frå dei folkevalde og frå dei som er med og opptrer.
- Så langt har me hatt fire-fem kommunestyremøte på denne måten, og eg har ikkje hatt problem i det heile tatt med å skaffe folk til å opptre. Eg har stor tru på at det skal gå like fint i framtida óg.
Vel unnt
Trur han at andre kan ta lærdom av Tynset kommune? Ein lattermild kultursjef svarar:
- Du veit, me ville no helst kunne skryte av å vere den einaste kommunen i landet som er kulturelle på dette viset! Men sjølvsagt, dette er ein god idé, og andre må gjerne kopiere han.