Hårete dokumentar
Hentesveisen har vore ein klassikar innan hårfrisyrar gjennom ei årrekkje.
Sveisen skal fungere like godt til å dekkje over hårtap som til å skremme vekk det motsette kjønn.
Men til tross for svekka popularitet den siste tida, har den unike frisyren framleis slaviske tilhengarar.
Men kvifor, er vanskeleg å forstå.
Millionar til tross
Ein av dei som svergar til hentesveisen er amerikanaren Donald Trump, kjend som ein av verdas rikaste menn.
Nordmenn har blant anna kunne sjå både han og håret hans gi folk sparken i «The Apprentice» på TV Norge.
Ryktet skal ha det til at han trur hårfrisyren bringer han lykke, og at han difor ikkje vågar å byte.
Om det var hårfrisyren som i si tid gav han draget på sjølvaste Celina Midelfart, seier ryktet dessverre ingenting om.
Sendetid
For å høyre om fleire tilhengarar av hentesveisen og for å lære meir om dette merkverdige fenomenet, kan du sjå den amerikanske dokumentaren «Hentesveis» på NRK1 på laurdag klokka 22:05. Filmen varar i 55 minutt.