Sommarklikk: Klapp, klapp og trønder-is
I fem år var han sauebonde (utan sau) med slips og slagstøvlar og ein sær, inn-trøndersk dialekt. Are og Odin hadde ein eventyrleg radiosuksess, og mange var dei som fortvila då programmet la ned rett før jul i fjor.
I mars var «Odin»/Klaus Sonstad tilbake med nytt program og ny radiomakker. Klaus Sonstad Show går no på P3 alle kvardagar.
Skjønt, nett no er det ferie - også for Klaus og assistenten Else Kåss-Furuseth.
- Kor er du i ferien, Klaus?
- I Danmark med barna mine, systrene mine og deira barn. Full pakke med støy og stas.
- Kva er favoritt-isen din?
- Gullpinne! Og Rundpinne! Og Båtis! Og Creme Chocolat Mandel! Og den italienske isen i Celio isbar på «Solsiden» i Trondheim.
- Kva er den beste sommarmaten?
- Grillmat; pølser, koteletter, indrefilet av svin, laks. Og vassmelonsalat med fetaost, rødlauk og lime.
- Kva gjer du når det regnar?
- Ventar på at det skal bli sol.
- Kor går draumereisa?
- Ho går til Toscana, Italia.
- Saltvatn, ferskvatn eller klor?
- Saltvatn, utan tvil.
- Kva er ditt tips til sommarlektyre?
- Odd Eidem: «Cruise».
- Kva er den ultimate sommarlåten?
- «Klapp Klapp» med Are og Odin.
- Kva er det finaste sommarordet du veit?
- Jordbær.
- Kva synest du alle utanlandske turistar burde få med seg i Noreg?
- Innerdalen på Møre. FANTASTISK!