Låg aksjeetikk i organisasjonar
(NPK): Norges Røde Kors har som den største investoren ikkje nulltoleranse for investeringar i selskap som lagar våpen, alkohol, tobakk eller porno.
Kirkens Nødhjelp garanterer at dei ikkje plasserer ei krone i selskap av denne typen. Det kjem fram i ei undersøking NorWatch har gjort.
Av dei ti humanitære organisasjonane som Norwatch har sett på, er det fem som investerer i aksjar: Norges Røde Kors, SOS-Barnebyer, Redd Barna, Flyktninghjelpen og Kirkens Nødhjelp.
Til saman har dei plassert rundt en halv milliard kroner i aksjar, men berre to av dei, Røde Kors og Kirkens Nødhjelp, har utvikla retningsliner for investeringane, og Røde Kors meiner det er greit at fondsforvaltarane kan operere med både våpen, porno, tobakk og alkohol så lenge dei kontroversielle aktivitetane utgjer mindre enn ti prosent av den totale omsetninga.
«Verstingen» i oversikta er Flyktninghjelpen. Dei har mesteparten av aksjeinvesteringane sine i fond som ikkje er «etiske», og det er berre kort tid sidan dei kom i gang med å utvikle sine eigne etiske retningsliner.
Lyspunktet er at dei humanitære organisasjonane er meir opne om dei finansielle plasseringane og har større etisk fokus enn dei fleste andre investorar i Noreg, melder NRK. (NPK)