Ei oppdagingsferd i norsk musikk
Er du glad i musikk? Altså til dømes hard core, punk, kor, korps, dansebandmusikk, pop, viser, gamaldans, opera, elektronika, symfoniorkester eller slåttar? I så fall vil du heilt sikkert finne noko du likar på nettstaden
Kaleidofon
.
Vakker og mystisk
Den fysiske utstillinga Kaleidofon er blitt vist dei to siste vekene på Nasjonalbiblioteket i Oslo. Den 24. november dukkar ho opp igjen i Bergen, på kulturhuset USF. Men uansett kor du bur, kan du besøkje Kaleidofonen på nettet og gå på oppdagingsferd i norsk musikk i alle variantar.
Nettstaden er vakker og litt mystisk i seg sjølv, og innbyr til eksperimentering. Kanskje du oppdagar noko du ikkje visste frå før? Kanskje du kjem over noko du ikkje visste at du elska?
Kaleidofon på nettet er delt inn i fire hovudsjangrar: Populærmusikk, kunstmusikk, folkemusikk og jazz. Men dette er ikkje noko typisk tørt føredrag. Heile nettstaden ein tumleplass for den som vil gå på skattejakt i den norske musikken.
Opne øyrene
Du finn omlag 80 korte tekstar med tilhøyrande lytteeksempel frå alle tenkjelege sjangrar. Målet med det heile er å opne øyra til publikum og bryte ned kunstige skilje mellom sjangrar og miljø.
- Dette er ikkje nokon total musikkhistorisk gjennomgang, seier prosjektansvarleg Aslak Oppebøen, informasjonssjef i Musikkinformasjonssenteret (MIC) til
Ballade
. Saman med prosjektleiar Grethe Melby har han hatt hovudansvaret for utstillinga.
Fragmentarisk blikk
- Kaleidofon tilbyr ikkje eit djupdykk, men eit fragmentarisk blikk på kor norsk musikk står i dag og med røter tilbake i historia, fortset Oppebøen.
Kaleidofonen finst både i engelsk og norsk versjon, han er laga for å skulle kunne forandre seg i framtida, og har eit stort utviklingspotensial. Det skal også lagast katalogar av materialet, til bruk i formidlinga av norsk musikk i utlandet.
For eiga rekning legg vi til at
Kaleidofon
er heilt ubeskriveleg. Ta ein tur inn, sjå, lytt og drøym deg bort i det norske musikalske landskapet.