Mange på trygd utan diagnose
(NPK): Ei undersøking som blir publisert i siste nummer av Tidsskrift for Den norske lægeforening, har sett på helsetilstanden til 200 personar som har søkt uføretrygd på grunn av muskel- og skjelettplager.
Funn viser at søkjarane hadde høg grad av sjølvopplevd helse- og funksjonssvikt. Dei hadde store helseplager og samansett funksjonssvikt som smerte, låg fysisk yteevne, uheldig livsstil og sosioøkonomiske belastningar. Objektive medisinske funn er det sjeldan ein kan påvise.
Gjennomsnittleg alder for uføretrygd i den undersøkte gruppa var 55 år. 64 prosent var kvinner, om lag ein firedel var frå ikkje-vestlege land.
To av tre søkjarar hadde mindre enn 13 års skolegang, og 55 prosent hadde vore i eit serviceyrke. 59 prosent av dei undersøkte dreiv aldri nokon form for fysisk aktivitet. Nesten en firedel var overvektige.
Det siste tiåret har det vore ein jamn auke i talet på uføretrygda. Ved utgangen av 2005 var det til saman 319.691 uføretrygda her i landet. Dei med muskel- og skjelettplager som hovuddiagnose utgjer om lag ein tredel av desse. (NPK)