SV vil demonstrere mot regjeringa
(NPK): Regjeringa vurderer framleis situasjonen og har førebels ikkje svart NATO på oppmodinga om å auke styrkebidraget. Saka er vanskeleg for SV, som er tufta på NATO-motstand.
No brukar SV-arar nederlaget om CO₂-reinsing av gasskraft på Mongstad som brekkstong for at regjeringa skal seie nei til fleire soldatar i Afghanistan.
Men leiar i Senterpartiet, Åslaug Haga, meiner det er sjølvsagt at Noreg stiller opp for NATO når det gjeld å sende soldatar til Afghanistan.
- Vi kan ikkje overlate dritjobbane til USA og Storbritannia og berre ta dei snille, humanitære oppdraga sjølv, seier Åslaug Haga til Dagsavisen.
Haga presiserer derimot til avisa at utsegnene hennar er generelle, og ikkje mynta på Sør-Afghanistan spesielt. Regjeringa har nemleg ikkje teke standpunkt i saka enno.
Det er i kampane mot Taliban og andre opprørarar i Sør-Afghanistan at NATO treng norsk hjelp. Det er spådd å bli dei tøffaste kampane for norske soldatar sidan andre verdskrigen. (NPK)