Siste kommune på nett
Viss du ønskjer å finne nettstaden til ein norsk kommune, kan du no berre skrive kommunennamnet og «kommune.no» og alltid kome fram.
Halden kommune var først ut. Allereie i 1995 fekk kommunen eigne nettsider, og smått om senn har resten av kommune-Noreg følgt etter.
Hadsel.kommune.no opna i slutten av september i år, som sistemann ut i rekkja av kommunale nettstader.
Kvalitet først
Men korleis kunne det bli 2006 før Hadsel kom seg på nett? Ordførar Reidar Johnsen får svare:
- Me kunne nok fått oss nettside tidlegare, men då ville det blitt med ei dårlegare løysing enn den me har fått no. Det ville me rett og slett ikkje.
Hadsel kommune og Vestvågøy kommune har nemleg jobba saman om å utvikle fri programvare , eit arbeid kommunane fekk Høykom-midlar (statlege midlar til IKT og breibandsutvikling) til. Og slikt arbeid tar tid.
- Me påtok oss eit utviklingsarbeid som me ønskte å følgje heilt i mål.
Elektroniske søknader
Nordlandskommunen Hadsel sine heimesider var eigentleg så godt som klare før sommarferien, men kommunen valde å ikkje hoppe ut i det på eit så pass sårbart tidspunkt.
- Nei, me såg ikkje noko poeng i lansere ein nettstad i den tida kor dei som jobbar med nettutviklinga hadde ferie. Me ville heller nytte tida til litt ekstra kvalitetssikring og utsette lanseringa til hausten.
Sist torsdag vart hadsel.kommune.no offisielt opna for kommunestyret i Hadsel. Men framleis er ikkje nettstaden heilt ferdig.
- Dessverre manglar me ein siste bit, nemleg presentasjon av kommunen, med kart, innbyggjartal og slike ting.
Men det kjem, lovar ordføraren.
- Me er dessutan stolte av å ha ei god interaktiv teneste til innbyggjarane våre. Hjå oss kan du nemleg søkje om jobb, barnehageplass eller byggjeløyve elektronisk.
Heile Noreg skal vurderast
No ser Hadsel kommune med spenning fram til kva som skjer når Noreg.no skal kvalitetsvurdere alle offentlege norske nettstader. Det gjer dei kvart år, og kommunar og statlege etatar får karakterar basert på kor gode dei er på tilgjengelegheit, brukartilpassing og nyttig innhald, informasjon og tenester.
Resultatet av vurderinga skal leggjast fram på ein konferanse om kvalitet på norske nettstader som Noreg.no skal arrangere 1. desember.
- Eg trur me kjem godt ut av ei slik vurdering, seier ordføraren i Hadsel.
- Me har jobba så hardt med utviklinga av fri programvare og er så fornøgde med det me har fått til. Får me ikkje gode resultat i undersøkinga, vert me veldig skuffa.