Firefox på nynorsk
I slutten av oktober kjem den nye versjonen av nettlesaren Firefox, som skal ha ei mengde nye funksjonar. Allereie no får du høve til å prøve den ut.
Enkelt og ryddig
Mange Firefox-entusiastar sver til denne nettlesaren fordi den gjer det mogleg å opne fleire faneark innanfor ei side, slik at du ikkje treng ha så mange vindauge opne som i t.d. Internet Explorer.
Nytt for Firefox 2.0, er du kan trykkje på linkar på ei side, og så opnar den nye sida seg også i eit faneark, i staden for i eit nytt vindauge som tidlegare. Kvart faneark blir dessutan utstyrt med ein eigen lukkeknapp.
Tryggare mot svindel
Utvida søkjefunksjonar og høve til å redigere søkjemotorane er andre endringar som Firefox-brukarar kan glede seg over. Dessutan vil nettlesaren få utvida tryggleik for såkalla «phishing».
Viss du ikkje kjenner til omgrepet «phishing», så kan det forklarast slik: Du får ein e-post frå ein institusjon som tilsynelatande ser truverdig ut, t.d. frå banken din. Du blir beden om å verifisere personleg informasjon, som kontonummer, personnummer osb. E-posten sender deg då vidare til ei nettside som også ser tilforlateleg ut, men som berre er svindel.
I nye Firefox vil du bli åtvara når nettlesaren din trur du er på veg inn i slike mistenkjelege, forfalska nettsider.
Ikkje så trygg?
Nettopp dette med tryggleik er ein av grunnane til at mange vel å bruke Firefox framfor den meir kjende og meir brukte Microsoft Internet Explorer. Men no viser dessverre ein rapport at også Firefox har fleire alvorlege hol i tryggleiken.
No på nynorsk
For ihuga nynorskbrukarar er det god grunn til å glede seg, for no kan du velje nynorsk som brukarspråk i Firefox.
Der du før vart åtvara: «Du vil nå lukke 5 åpne faner», minner nye Firefox deg om at «Du vil no lata att 5 opne faner». Vidare kan du «handsame bokmerke», og «Vis» i menylinja heiter «Syn».
Ei undersøkjing IT-avisen viser til, fortel at Internet Explorer framleis har 80% av marknadsdelen i nettlesarverda, medan Firefox har 10%.