SV-vedtak kan bli regjeringspolitikk
(NPK):Landsstyret til SV vil ikkje krevje CO₂-reinsing frå dag ein for gasskraftverket på Mongstad. Men partiet vil gjere det slik at Statoil ikkje slepp unna å byggje reinseanlegg.
- Vi slår veldig klart fast at nye gasskraftverk skal ha CO₂-reinsing. På Mongstad må Statoil planleggje, investere i og byggje ut reinseanlegg parallelt med sjølve gasskraftverket. Dette er heilt i tråd med Soria Moria, slår SV-leiar Kristin Halvorsen fast.
Reaksjonane frå dei raudgrøne energi- og miljøpolitikarane på Stortinget tyder på at det er gode moglegheiter for at SV kan få gjennomslag i regjeringa når dei no går vekk frå kravet om reinsing frå dag ein.
Miljørørsla er positive til SV-løysinga.
- Det er eit godt vedtak. No er det viktig å få med Sp og Ap på å stille så trenge krav til Statoil, slik at dei ikkje slepp unna å byggje eit reinseanlegg, seier leiar i Naturvernforbundet, Lars Haltbrekken.
LO har kjempa for at Mongstad skal setjast i drift sjølv om reinsing ikkje er på plass. No helsar også LO-leiar Gerd-Liv Valla SV-vedtaket velkomen. (NPK)