Fordømmer japansk trussel mot Nord-Korea
Seoul (NTB-Reuters-AFP): - Det er ei alvorleg utvikling at japanske ministrar kjem med utsegner som rettferdiggjer førebyggjande angrep og bruk av militærmakt mot Korea-halvøya, seier talsmann for president Roh Moo-Hyun, Jung Tae-Ho.
Japanske leiarar har sagt at dei vurderer om eit førebyggjande angrep mot Nord-Korea vil vere i strid med landets pasifistiske grunnlov fra 1947.
Krisa rundt det Nord-Koreanske atomprogrammet tilspissa seg ytterlegare sist veke etter at Nord-Korea skaut ut sju rakettar, blant dei ein langdistanserakett som i teorien skal kunne nå heilt til USA.
Samstundes kom det tysdag rapportar om at Nord-Korea kan vere i ferd med å førebu ei ny oppskyting av rakettar.
Amerikanske og japanske satellittbilde syner ny aktivitet ved dei nordkoreanske rakettbasane, ifølgje japanske regjeringskjelder. (©NTB)