TV og spel like farleg som tobakk
(NPK): Det meiner amerikanske forskarar i ei spesialutgåve av fagtidsskriftet Archives of Pediatric and Adolescent Medicine.
Forskinga viser at barn som brukar mykje tid på TV og ulike former for valdsorienterte TV-spel har auka risiko for å bli overvektige, for å ty til tobakk og alkohol, risikabel seksuell åtferd, valdeleg åtferd og sosial isolasjon.
Det er forskarane Dimitri Christakis og Frederick Zimmerman ved University of Washington i Seattle som meiner forskinga på området er så eintydig at TV- og spelbruken til barn burde sjåast som eit helseproblem på linje med tobakksbruk.
- Vi utfører eit stort kontrollert eksperiment på barna våre og ventar for å sjå kva resultata vil bli, seier Christakis til New Scientist.
I USA brukar barn meir tid på å sjå fjernsyn og leike med videospel enn dei brukar på å sove. Kvart tredje barn under seks år har TV på rommet sitt. Trenden er at barn heilt ned til spedbarnsstadiet blir utsett for timevis med TV-sjåing per dag. (NPK)