Rusrekord på vegane i fjor
Av Kari Hamre, Nynorsk pressekontor
Det er også mange fleire som vert pågripne grunna mistanke om ruskøyring. Talet har auka frå 5.624 i 2004 til 5.939 i fjor, melder Trygg Trafikk.
Ei gransking av dødsulukker med berre ein bil innblanda i 2001 og 2002, viste at rusmiddel var ein medverkande årsak i to av tre dødsulukker. Det kan vere ei blanding av alkohol og piller, men også ulike typar ulovlege narkotiske stoff eller sterke lækjemiddel.
Spyttest
I dag brukar politiet utandingsprøvar for å avsløre promillekøyrarar. Målet er å finne ein tilsvarande snøggtest for andre rusmiddel, ein såkalla spyttestar.
- Så langt har vi ikkje funne ein test som er effektiv og rask nok. Uansett er politiet i Noreg blant dei beste i verda til å kontrollere og førebyggje ruskøyring. Det vert avslørt mange russjåførar trass i mangelen på ein slik snøggtest, seier avdelingsdirektør Asbjørg Christophersen ved Nasjonalt folkehelseinstitutt.
Det vert framleis prøvd ut ulike spyttestar. I løpet av våren og sommaren vil sjåførar enkelte stader i landet få prøve dei ut, i samband med ei ny gransking om ruskøyring. (NPK)