- Statlege bedrifter må ha fleire innvandrarar
(NPK): - Eg skal diskutere med dei om dei også vil forplikte seg til ei inkluderande utforming av stillingsannonsar, oppfordre personar med innvandrarbakgrunn til å søkje, og sikre at kvalifikasjonskrav vert utforma, slik at det vert søkt etter kompetanse, ikkje norsk utdanning, seier arbeids- og inkluderingsminister Bjarne Håkon Hanssen.
Ministeren har kalla inn 32 direktørar i statlege verksemder til møte for å gjere tydeleg at regjeringa forventar at desse har ein aktiv rekrutteringspolitikk i forhold til personar med innvandrarbakgrunn.
Haldningar frå arbeidsgjevarar er ein barriere for mange innvandrarar i forhold til å bli kalla inn til intervju. Både det å ha eit namn og utsjånad som signaliserer at ein ikkje har norsk bakgrunn, kan gjere at ein vert sortert vekk av arbeidsgjevarar i konkurransen om jobbane.
- Vi har som langsiktig mål at like mange blant innvandrarbefolkninga skal vere i jobb som i heile befolkninga, seier Hanssen. (NPK)