Dei fleste isbreane minkar
Artikkelen fortsetter under annonsen
Denne artikkelen er over ett år gammel og kan innholde utdatert informasjon
Artikkelen fortsetter under annonsen
Glittertind i Aust-Jotunheimen er det nest høgste fjellet i Noreg og Nord-Europa, 2.452 m.o.h. Medrekna isbreen er Glittertind høgare enn snøfrie Galdhøpiggen. I Jotunheimen er dei fleste brear i tilbakegang, og har vore det i lengre tid. (Foto: Hallvard Østrem, NPK)
(NPK): Åtte brear endra seg svært lite siste året, går det fram av årlege målingar i NVE-regi.
Dei 28 breane, 24 i Sør-Noreg og fire i Nord-Noreg, blir målt ved det nedste punktet på breen kvart år.
For tre av breane har dette punktet flytta seg mellom 50 og 60 meter sidan i fjor.
Ein av desse, Rembesdalsskåka i Hordaland, har trekt seg attende heile 206 meter sidan år 2000.
- Også året 2005 føyer seg inn i ein lengre trend av minkande storleik på norske isbrear, seier overingeniør Hallgeir Elvehøy i NVE.
- Denne utviklinga starta på slutten av 1990-talet etter ein 10-års periode der mange brear gjekk fram. Vi ser at breane reagerer på endringar i klima. Breane vil truleg ikkje forsvinne, men stabilisere seg på ein mindre storleik enn den vi ser i dag.
På Vestlandet har dei fleste breutløparane frå platåbreane vore i tilbakegang sidan slutten av 1990-talet. Endringane har vore store, som på Briksdalsbreen som gjekk fram nesten 400 meter mellom 1987 og 1996, og som har trekt seg tilbake over 200 meter sidan 1999.
I Jotunheimen er dei fleste brear i tilbakegang, og har vore det i lengre tid. Det finst nokre unntak som har hatt framstøyt på 1990-talet, som Storgjuvbreen, Bøverbreen og Svellnosbreen.
I Nord-Noreg har dei målte breane trekt seg attende 100-200 m sidan 1998. Det ser ut til at dei aller fleste brear i Nord-Noreg er i tilbakegang, og at dei fleste har vore i tilbakegang i lang tid.
Unntaka er nokre brear i Nordland som Engabreen og Fonndalsbreen (Svartisen), ein brearm frå Okstindbreen og ein brearm frå Blåmannsisen som har hatt framstøyt. (NPK)
