Jaktar på ny suksessforfattar
(NPK): Forfattaren Unni Lindell skal vurdere bidraga, og dei beste historiene blir publisert i ei bok som skal koma i sal hos Narvesen.
Det ambisiøse målet er å finne fram til den nye store norske forfattaren.
Det er forlaget Aschehoug som samarbeider med Narvesen om skrivekonkurransen, som skal bidra til gode lesevanar, skape engasjement og altså medverke til at Aschehoug finn fram til den neste norske suksessforfattaren.
Det er ønskjeleg med forteljingar på 5-15 sider som fortel om det spanande eller fantastiske der ein kanskje ikkje trudde at det fanst, om det livsviktige eller tilsynelatande trivielle.
I første omgang skal det kårast fem regionale vinnarar i Nord-, Midt-, Vest-, Sør- og Aust-Noreg som får 10.000 kroner kvar i honorar.
Blant desse blir det kåra ein landsvinnar som får 50.000 kroner. (NPK)