Greier du å ikkje kjøpe noko?
Den siste laurdagen i november kvart år er det verdas kjøpefrie dag, eller «buy nothing day», som det heiter på engelsk.
Starta i Canada
Verdas kjøpefrie dag er ei internasjonal markering mot den ville veksten i forbruket i den vestlege verda. Det starta i Canada i 1992, og har no spreidd seg til 40 land.
Denne laurdagen, når julehandelen set i gang for alvor, er ei rekkje organisasjonar med på å markere at det kanskje er betre ting å bruke pengene på enn å ta heilt av før jul.
Buddhistar i nissedrakt
I Noreg er 13 organisasjonar med på årets markering. På markeringa i hovudstaden skal blant anna Nettverk av engasjerte buddhistar meditere i nissedrakter på Stortingsplassen som ein reaksjon på handlemaset.
Organisasjonen Framtiden i våre hender skal dele ut grøne gåvekort og vere shoppingpoliti. Dei skal få folk til å blåse for å finne ut om dei er «shopoholikarar».
Meiningslaust
Det er meiningslaust og øydeleggjande å fortsetje forbruksveksten, skriv Framtiden i våre hender på nettsidene sine i samband med markeringa.
I tillegg til Framtiden i våre hender og Nettverk av engasjerte buddhistar er Adbusters, AUF, Senterungdommen, Unge Venstre, KrFU, Grønn Ungdom, Changemaker, Spire, Oslo kristne studentforbund, Blekkulf og Grønn hverdag med på markeringa.
Det er niande gongen verdas kjøpefrie dag blir arrangert i Noreg.