Breim Noregs Countryhovudstad
Eit nasjonalt kompetansesenter for countrymusikk, og eit opplevingssenter for heile familien.
Dette er det dei ser føre seg, prosjektgruppa som jobbar med ideen om at countryfestivalen i Breim kan utvikle seg til eit nasjonalt senter.
I 11 år har Norsk Countrytreff vore skipa til i Breim i Gloppen kommune i Sogn og Fjordane.
Eit stort dugnadsapparat har vore i sving kvar sommar, og på det meste har 600 frivillige frå Breim og bygdene rundt sørgt for ramma rundt country-musikken.
B-kultur
Prosjektgruppa legg vekt på at countrymusikken er sett på som B-kultur, ikkje berre musikalsk og stilmessig, men óg politisk.
Dei meiner det ligg eit stort paradoks i at mens countrymusikken synest å vere politisk usynleg, samstundes som dei ser ein aukande skare som dyrkar musikken og stilen.
Dei ønskjer å auke statusen for countrymusikken, og vere med å utvikle ei av dei største musikalske og folkelege rørslene i landet, heiter det i eit prosjektnotat.
Internasjonale artistar
Sist sommar kunne eit begeistra publikum i Breim mellom andre oppleve artistane Billy Yates og Ricky Skaggs frå USA og Snörurnar frå Island.
Av norske artistar stilte Morten Vestly, Ove Støylen, G Thomas, Long Horn og Vassendgutane.
Alt sydd saman av konferansierane Ottar 'Big Hand' Johansen og Tore Andersen.
Kjelder:
- Norsk Countrytreff
- Avisa Firda
- Prosjektnotat frå stiftinga Norsk Country Treff