Halvdan Sivertsen bannar i kyrkja
Saman med bandet sitt besøker Sivertsen kyrkjer over heile landet heile hausten, og han reknar med å halde fram i 2006.
Det er i følgje nettsida til Sivertsen 1600 kyrkjer i Noreg, men han veit ikkje kor mange han rekk.
Passar ikkje i kyrkja
I Kristiansand domkyrkje er han booka inn i november, men sokneprest Arnfinn Torjussen synest ikkje tekstane til Sivertsen høver så godt for kyrkjerommet.
I den kjende songen «Kjærlighetsvisa» heiter det:
«Men av og til når tegnan blir førr tydelig,
Og dem som sett med makta gjør mæ skremt.
Når de fine ordan demmes bi motbydelig,
Og tankan bak e jævli' dårlig gjemt.»
Sivertsen reknar denne songen som signatursongen sin, og avsluttar kvar konsert med den.
Torjussen synst ikkje ordet «jævlig» høyrer heime i kyrkja.
Han seier til avisa Fædrelandsvennen at han beklagar at han ikkje fekk tekstane til gjennomlesing før kontrakten blei skriven. Men han vil ikkje stoppe konserten no, på grunn av eit einaste ord.
Politisk betent
Ingen kyrkjer har stoppa konserten til Sivertsen, men det har vore ein del diskusjonar og motførestellingar.
Sognepresten i Molde, Harald Sunde, er ikkje så opptatt av ordet jævlig. Han reagerer derimot på songen «Amerika», som han meiner har ein politisk betent tekst.
Også Humanetisk Forbund har kritisert turneen til Halvdan Sivertsen. Dei meiner at han taler statskyrkja si sak med den populære turneen sin.
Kyrkja er for alle
Sivertsen har kalla turneen «Gjør døren høy», og er opptatt av at kyrkjerommet skal vere ein stad for heile mennesket, og for alle.
«Et kulturhus i ordets beste forstand, med plass for undring, tvil og tro, og musikk. Og humor», skriv han på heimesida si.
Han synest det er greitt at folk ikkje liker songane hans, men let seg ikkje sensurere.
- Det kan hende at kulturen for slike uttrykk nok er meir romsleg i nord enn sørpå, seier han til Avisa Nordland.
Tek avstand frå det vonde
Sivertsen har sjølv katolsk bakgrunn, og meiner at han ikkje kallar på vonde makter med ordet jævlig. Poenget med linja er nettopp å ta avstand frå det vonde.
Til tross for kritikken har konsertane til no hausta strålande kritikkar.
Kjelder:
• Halvdan Sivertsen sin nettstad
• Avisa Nordland
Fleire nynorsk-artiklar:
Nynorsk
- Helse og samliv
- Kultur
- Mat og Drikke
- Moro
- Nett
- Nyhende
- Konkurransar