Kamp for nynorsk som mediespråk

(NPK): - Eg vil påstå at den liberale språkpolitikken til Bergens Tidende har vore viktigare for nynorsken enn noko anna dei siste femti åra, sa Olav Kobbeltveit under 50-årsjubileet til Kringkastings

4. okt. 2005 10:58 – Oppdatert 4. okt. 2005 10:58

Denne artikkelen er over ett år gammel og kan innholde utdatert informasjon

Av Johanne Landsverk, Nynorsk Pressekontor

Leiaren i Nynorsk mediesenter, Magni Øvrebotten, vart heidra under jubileumsfesten . Ho har kjempa hardt for å behalde NRK Sogn og Fjordane i Førde. (Foto: Johanne Landsverk, NPK)

På seminaret «Språk er makt i media» snakka Olav Kobbeltveit frå Bergens Tidende (BT) om den språkpolitiske utviklinga i avisa fram til i dag.

- Tidlegare var det berre stoff frå distriktet som kunne skrivast på nynorsk i BT, medan alt stoff frå by og utland måtte vere på bokmål, fortalde han.
Men med redaktør Kjartan Rødland kom den gamle språkpolitikken i ulage, og nynorsken braut nytt land. Dette var ein redaktør som tykte nynorsk var brukande til meir enn «fjos, flor og fiskeri».

Kobbeltveit meinte at 30 år med aktiv kamp for nynorsk i BT har vore heilt uvurderleg.

Rommetveit i sentrum

Eg vil påstå at den liberale språkpolitikken til Bergens Tidende har vore viktigare for nynorsken enn noko anna dei siste 50 åra, sa Olav Kobbeltveit under 50-årsjubileet for Kringkastingsringen. (Foto: Johanne Landsverk, NPK)

Under seminaret heldt også Sylfest Lomheim foredrag om Magne Rommetveit og nynorsken i NRK. Både Lomheim og Rommetveit har vore språkkonsulentar i statskanalen, og her fekk vi eit innblikk i korleis det har stått til med nynorsken i NRK frå byrjinga og fram til i dag.

Rommetveit gjorde også ein stor innsats som dagleg leiar i Kringkastingsringen dei første åra, og difor stod han på mange vis i sentrum under jubileumsfeiringa, ikkje minst på festen om kvelden.

Og kven kunne passe betre til å hylle Kringkastingsringen enn Are Kalvø, som i år fekk Kringkastingsprisen? Med sin typiske skarpe satire kåserte han over teamet «Korleis bli kvitt bokmålet?»

Under jubileumsfesten vanka det også heider til Magni Øvrebotten som har kjempa hardt for å behalde NRK Sogn og Fjordane i Førde, og som no er leiar for Nynorsk mediesenter i Førde. (NPK)