Anorektikar i reklamekampanje

(Foto: Reuters/Scanpix)

Det italienske klesmerket «Nolita» brukar ei anorektisk kvinne i sin reklamekampanje under moteveka i Milano.

I tillegg til å promotere klesmerket, er kampanjen meint å setje sjukdommen anoreksia på dagsorden. Bilda har blitt trykte i ei rekkje italienske aviser og på enorme plakatar i Milano.

Kontroversiell

Mannen bak kampanjen er den kontroversielle, italienske fotografen Oliviero Toscani. I 1992 fotograferte han ein mann som var døande av AIDS i ein reklamekampanje for kleskjeda Benetton.

Eivor Øvrebø, modellmamma i Team Models, har lita tru på kampanjen til Toscani.

- Det er trist å sjå bilda. Men om dette er den rette vegen å gå for å få bukt med anoreksia, er eg usikker på. Sjukdommen har så mange årsaker. Motebransjen har kanskje ein del av skulda, men det er så mange andre faktorar som speler inn. Å smelle opp ein kjempeposter i Milano er ikkje løysninga, etter mi meining, seier Øvrebø til ABC Nyheter.

Kvinna på Toscanis bilde ligg naken, breitta ut over plakaten i modellpositur, med blikket vendt ut mot publikum. Over bildet står det «No Anorexia» med store, rosa bokstavar.

- Toscani likar jo å sjokkere med ting han gjer. Han er ein dyktig fotograf, fri og bevare meg, men eg forstår ikkje kva han vil med ein slik kampanje, seier Øvrebø.

- Om det er meint som skrekk og advarsel til dei som har anoreksi, risikerer han motsatt verknad. Anorektikarar vil jo alltid synest at dei er for tjukke. Når dei ser denne plakaten, kan dei tenkje: «Så tynn skal eg også bli», reflekterer ho.

Feil strategi

Målet til Toscani er å bruke den nakne kroppen for å vise fram den mørke realiteten bak sjukdommen, «som i dei fleste tilfelle er skapt av dei stereotypane som moteverda påtvingar oss», står det i pressemeldinga frå selskapet bak Nolita.

Modellen til Toscani er franske Isabelle Caro, som har vore anorektikar i 15 år og veg 31 kilo. Ho lid også av hudsjukdommen psoriasis.

Eivor Øvrebø gjekk for ei tid tilbake ut i media og skulda norske modellar for å vere for late og tjukke.

Ho meiner likevel at den franske modellen er langt tynnare enn det som er vanleg:

- Det er ingen fotomodellar som berre veg 31 kilo. Modellar kjem i alle storleikar og fasongar. Dei som jobbar i moteshowa er høge, slanke og tynne i eit normalt augesyn, men det må dei vere om dei skal passe i kleda. Men ingen har rett til å seie at dei har eteforstyrringar.

Supertynne modellar fekk mykje mediamerksemd i fjor, etter at jenter med BMI (Body Mass Index) under 18 blei bannlyst frå catwalken under moteveka i Milano. Normal BMI blir rekna for å vere mellom 18,5 – 25).

Eivor Øvrebø meiner at Milano vel heilt feil strategi:

- Det blir heilt feil å gå ut frå BMI. Alle er forskjellig bygd. Dei med tung beinbygning veg meir enn dei med smal beinbygning, noko som utan grunn kan gje dei BMI-verdi som overvektig. Sjølv har eg ein BMI på under 17 og skulle ha vore innlagd om ein skulle bruke d\et som rettesnor. Ein kan ikkje stengje unge, friske jenter ute sjølv om dei er tynne som beinrangel. Modellane er gjerne 15-16 år gamle jenter, lange, tynne og i utvikling.

Får ikkje livsforsikring

Øvrebø kan fortelje at ei av jentene som jobbar som modell i Team Models ikkje får livsforsikring fordi BMI-verdien hennar ikkje er høg nok:

- Det er tullete og sjokkerande. Denne jenta et havregraut kvar morgon og har aldri vore sjuk. Men ho er ein lang tynn sak, med BMI under 17. Det blir ho straffa for.

Sjølv om Øvrebø ikkje synest særleg om kampanjen til Nolita, trur ho likevel den kan lukkast:

- All reklame er jo som kjend god reklame.