Raud, rund og frykteleg sur
Dei raude bæra kan også brukast til pynt inne. Plukk ein bukett og set han i ein vase, kanskje hjelper det mot både hauststormar og haustdepresjonar. Men pass deg for
flåtten
når du hentar rogn!
Fine og sure
Rognebær ser fine ut, men dei smakar heilt utruleg surt for menneskemunnar. Det går likevel an å bruke dei fine raude kulene til noko ein kan både spise og drikke, viss ein berre legg ned litt arbeid i saka. Viss ein venter med haustinga til det har vore ei frostnatt eller to, blir smaken mildare. Ein kan også leggje bæra ei natt i fryseboksen, viss ein ikkje vil vente på frosten.
Rognebærgele
Rognebærgele er kjempegodt til kjøtt. Det finnest eit utal oppskrifter på rognebærgele på nettet. Ei av dei er denne, som vi fann hos
Kunnskapsbasen.com
:
Du treng:
1 kg reinsa rognebær
2 dl vatn
3/4 kg sukker pr. liter saft.
Du gjer slik:
Plukk bort alle mørke og stygge bær, og kok bæra i vatn under lokk til massen blir mindre, fargen blir svakare og safta kjem ut. Så silar ein safta frå bæra ved å bruke eit silenett (eller ein kjøkkenhandduk).
Mål opp safta og kok ho opp, rør inn sukker og kok utan lokk i ca 5 minutt.
For å vite om geleen er ferdig kan du helle litt på eit fat og late han stå til han får ei hinne. Blir han øydelagd av at du pirkar i han med ei skei, må du la han koke litt til.
Hell den ferdige geleen på varme glass med lokk, og skru dei igjen med det same.
Viss dette gjekk bra, kan du jo prøve deg på
rognebærvin
.