Fleire matspesialitetar i butikken
Særeigne norske matvarer med merka «Beskyttet betegnelse» og «Spesialitet» får no innpass i det landsomfattande butikknettet til NorgesGruppen, opplyser Newswire.
Ei MMI-gransking frå i sommar, viser at meir enn kvar tredje forbrukar gjerne vil kjøpe slike matspesialitetar i butikkane.
Den uavhengige stiftinga Matmerk forvaltar merkeordningar for norskprodusert mat. Merka gir forbrukarane garantiar om at maten er kva den gir seg ut for å vere, og at produkta oppfyller bestemte kvalitets- og spesialitetskrav. Strenge krav til geografisk opphav er også eit kriterium for merkebruk.
Salet er avgjerande
I første omgang vil hovudtyngda av varene bli å finne i Centra, Ultra og Menybutikkane. Men på mindre stader vil også Sparbutikkane ta inn norske matspesialitetar. Det breiaste sortimentet vert å finne i dei største butikkane i dei store byane.
Produsentane kjem til å jobbe med aktivitetar i butikkane kvar månad, og sel ikkje varene godt nok forsvinn dei ut av butikkhyllene. (NPK)