Eit døgn med drama
I helga bør du få med deg den prisløna dramafilmen «Hawaii, Oslo» frå 2004.
Ei gammal pakt
Leon (Jan Gunnar Røise) bur på ein institusjon i Oslo og har for vane å springe ifrå problema sine midt på svartaste natta.
Han hugsar endå at han som 14-åring inngjekk ei pakt med barndomskjærasten Åsa (Eva Kasseth Røsten). Dei lova kvarandre å møtast igjen når han fyller 25 år, viss ingen av dei har funne seg ein partnar i mellomtida.
Ein av Leon sine pleiarar, den sanndrøymde Vidar (Trond Espen Seim), drøymer derimot at noko forferdeleg skal skje på nettopp denne dagen.
Det gir Leon grunn til å sjå fram til møtet med både glede og redsel.
Møter broren
I staden for Åsa, møter Leon overraskande på bror sin, Trygve (Aksel Hennie). Trygve har fått ein dags permisjon frå fengselet for å feire gebursdagen til broren, men legg eigentleg planar om alt anna enn fest. Han treng nemleg hjelp av Leon til å rømme frå fengselet og kome seg til Hawaii.
Men Leon har eit heilt anna Hawaii i tankane.
Vikla inn i kvarandre
I Oslo-gatene møter me også eit syskenpar som er redde for barnevernet, ein falmande songar som vil ta sjølvmord, ei kvinne som tar overdose og foreldra som vil gjere alt for å redde livet til spedbarnet sitt.
Alle historiene blir fletta saman på ein vakker, finurleg måte.
Kritikarrost
Norske filmkritikarar stemde i 2004 fram «Hawaii, Oslo» som vinnaren av Den Norske Filmkritikerprisen. Same året vann filmen to Amanda-prisar for beste kinofilm og beste manus.
I tillegg fekk filmen terningkast 6 frå meir enn halvparten av dei norske filmmeldarane.
Sendetid
Det norske kvardagsdramaet «Hawaii, Oslo» går på NRK 1 søndag klokka 21.15, har 11 års aldersgrense og varar i to timar.