ABC Nyheter

SV-statsråd Kristin Halvorsen ønskjer å styrke hovudmålet i skulen ved å redusere satsinga på sidemål. Utdanningsdirektoratet har mellom anna foreslått å fjerne eigen karakter i sidemål.

Les også: Halvorsen vurderer mindre satsing på nynorsk

– Dei som jobbar med norskfaget i skulen ser at ein ikkje blir dårlegare i hovudmål av å lære sidemål, men tvert imot. At ein kan styrke hovudmål ved å nedprioritere sidemålet, har ingen bakgrunn i forsking. Dette er ein myte som er skapt av Unge Høgre og FrpU på jakt etter stemmer. Dei har til og med klart å lure SV-ministeren, seier Håvard B. Øvregård, leiar i Noregs Mållag, til ABC Nyheter.

– Dramatisk

Han meiner forslaget frå Halvorsen vil føre til ei dramatisk svekking både av norskfaget og nynorsk som offisielt språk.

– Nynorsken sin posisjon i samfunnet blir i stor grad bestemt av nynorsken sin posisjon i skulen. Vi har i over hundre år hatt sidemålsstilen, som er ei eiga prøving i sidemål. Denne prøvinga sikrar at alle må ha ein basiskunnskap i skriftleg nynorsk. Viss vi ikkje har eigen karakter i skriftleg sidemål, anten eksamen eller standpunktkarakter, er vi sikre på at det vil ha negative konsekvensar for nynorsken, seier Øvregård.

Han minner om at dette er i strid med språkpolitikken til regjeringspartia, som alle gjekk til val på at dei skulle jobbe for meir likestilling mellom nynorsk og bokmål. Nynorsk er i dag fyrstespråket til om lag ein halv million personar.

– Folk er sinte der ute

– Eg har fått sinte telefonar frå medlemmar i Noregs Mållag, som også er aktive i SV. Dei lurer på korleis i alle dagar ein SV-statsråd kan presentere noko slikt. Eg veit at folk er sinte der ute, og er trygg på at regjeringspartia vil få ei klar melding frå grasrota i denne saka, seier Øvregård, som ikkje trur forslaget vil bli vedtatt.

– Forslaget er basert på manglande kunnskap om norskfaget, seier han.

Også Mållaget er positive til å reformere norskfaget. Dei ser for seg ei løysing med ein samla standpunktkarakter i norsk, så lenge ein har obligatorisk eksamen i sidemål.

Les også: Statens vegvesen får språkrefs

– Lærarane kan for lite

I tillegg vil dei sette strengare krav til norsklærarar.

– Vi er bekymra for at lærarane sin norskkunnskap er for dårleg, særleg i nynorsk. I dag behøver ikkje lærarar på 5. til 10. trinn norsk dersom dei ikkje skal undervise i faget. Vi meiner alle burde ha det.

Norskfaget bør også, i større grad, konsentrere seg om kjerneoppdraget, som handlar om å lære elevane å lese og skrive, meiner Øvregård.

– Læring om samansette tekstar og munnleg presentasjon er i større grad eit ansvar for alle faga. Problemet i dag er at norskfaget går langt utover det som handlar om å lese og skrive.

Kor stor plass bør sidemål ha i norskfaget? Diskutér gjerne.

Les også:

Therese Johaug får Dialektprisen

Antall nynorskelever: 1

Dette er Noregs mest sexy dialekt

Vil ha samisk tekst på norske mynter og sedler

Les fleire nyhende