ABCNYHETER

Oktober forlag gjev ut til saman 37 titlar i år. Av fem debutantar er fire klare med diktsamlingar. Som Rebecca Kjelland (24), ei frisk røyst som til ABC Nyheter forkynner at ho gjerne vil slå meir:

- Eg skulle gjerne slå meir. Eg likar å kaste ting. Ein gong kasta eg ei appelsin i golvet fleire gongar, slik at ho til slutt sprakk. Men draumen er å ha ein stor sandsekk, som eg berre kan bokse laus på og få ut alt, fortel debutanten.

Rebecca Kjellands debutbok har fått namnet «Akkorda under fluktlinja» og blir av forlaget karakterisert som «ei musikalsk diktsamling [...] med sterk tetralitet og eit rabiat språk», med eit dikt-eg som er «god til å slå».

Ifølgje Kjelland sjølv handlar samlinga om kommunikasjon, eller mest av alt anti-kommunikasjon, og at det er lett å slå når ein ikkje når fram.

Lars Ramslie (Foto: Scanpix)

Lars Ramsli er ingen nybyrjar i litterære samanhenger. Han har skrive fem romanar tidlegare, sist «Uglybugly» (2004) og «Fatso» (2003). No er han klar med si første diktsamling, «Kjøtt og bein», som blir utgjeven i november.

Edvard Hoem, som det siste året har hatt stor suksess med «Mors og fars historie», var til stades på Oktobers pressekonferanse for å presentere sin biografi om Peder Bjørnson - far til diktarkjempa Bjørnstjerne Bjørnson.

Peder Bjørnson var sokneprest og levde ifølgje Hoem eit stormfullt liv:

- Striare liv har vel knapt nokon prestemann hatt i noregshistoria.

Boka «Faderen. Peder Bjørnson forsvarer seg» har fått undertittelen «Eit mannsportrett frå det 19. hundreåret» og kjem ut mot slutten av oktober.

Heidi Marie Kriznik er klar med den vanskelege andreboka, etter kritikarrosa «Applaus» som ho fekk Vesaas' debutantpris for i 2002.

Heidi Marie Kriznik er klar med andreboka «Borte en vinter». (Foto: Kari M. Hestad)

- Eg har ein god dose prestasjonsangst for denne boka, ler Kriznik. - Den første boka blei svært godt motteke, men eg var ikkje førebudd på offentlegheita.

Ho fortel til ABC Nyheter at ho etter debutboka parallellskreiv på tre romanar samstundes, før ho for to år sidan bestemte seg for å fullføre «Borte en vinter» som er utgjevingsklar i oktober:

- Boka handlar om enkemannen Zenz, immigrant frå Austerrike. Det er etter mitt syn for mange som skriv om unge folk. Eg ville gå inn i hovudet på ein enkemann, ein som har vore gift i 34 år og brått står aleine, utan anna nettverk enn naboen.

- Zenz er ein god fyr, om enn noko sosialt handikappa. Når eg har lese utdrag frå teksten, har folk humra og oppfatta teksten som humoristisk. Det er i så fall utilsikta, og eg ser det ikkje sjølv, fortel Kriznik.

Forlagsredaktør Mattis Øybø er også klar med sin andre roman i desse dagar: «Ingen er alene». Han debuterte med kritikarroste «Alle ting skinner» i 2003.

Andre sentrale namn på Oktobers haustliste er Christian Refsum. Inger Bråtveit og Marit Tusvik med høvesvis «Ingen vitner for vitnet», «Siss og Unn» og «Sigrid Finne». Sistnemnde Marit Tusvik reiste til Sicilia, Island og Gotland for å skrive historia om mora, som no har blitt til ein ifølgje forlaget «vittig og djupt alvorleg roman om korleis livet diktar seg sjølv medan det pågår». Boka kjem ut i byrjinga av september.

Naomi Klein, forfattaren av den internasjonale bestseljaren «No logo», har no skrive boka «Sjokkdoktrinen. Katastrofekapitalismens fremmarsj» som kjem på Oktober i haust. Kleins siste bok skal utfordre myta om den globale, frie marknaden, og avsløre framveksten av «krisekapitalismen»: den målmedvitne, brutale sjokkbehandling av heile lands økonomiar.

Anne B. Ragde og Edvard Hoem på Forlaget Oktober sin presentasjon av haustens boklanseringar i Oslo tirsdag. (Foto: Sara Johannessen / SCANPIX)

Marknadssjef Elisabeth Steen kunne elles opplyse om at det går godt med Oktober forlag. Ikkje minst takka vere Anne B. Ragdes storseljande suksessromanar:

- «Ligge i grønne enger» har selt i 100 000 eksemplar på tre veker. Vi er strålande fornøgde, fortel ho.

Anne B. Ragdes bøker kjem no ut på heile 15 språk.

Her kan du lese fleire nyhende frå bokhausten.

ABC Nyheter litteratur